1Pe 3 | ASO | STEP | Ido' gomu' noluvoni' ne'mine igi vene' nete vadingine gelekele' i-ngidivo' minilo. Ee, ne'mine ikevo vadinge engikuti' linge ma Kilisito' gamazilo' gili dami nilizani' nene vene'ine lingine ha lengehelele izivo mini monovo goloso lengita nomivo monovo laminekovo' igi mili nizavo ingine a'mido' ningi mini' mini' ilizani' ne'mo nene lingine gamazi li-ngimamavosi Kilisito'nimu' gili ele'vole' igi eze zuhouko ha di imine' mili minilizahe. Nemu' lengi' nene ha gelekele' i-ngidivo' minilo.

1 Peter 3

Ele'ninge Va'ninge Lamini Minilizani' Monovomu' Petolo' Lo-ngimine' Gamazi

1 Ido' gomu' noluvoni' ne'mine igi vene' nete vadingine gelekele' i-ngidivo' minilo. Ee, ne'mine ikevo vadinge engikuti' linge ma Kilisito' gamazilo' gili dami nilizani' nene vene'ine lingine ha lengehelele izivo mini monovo goloso lengita nomivo monovo laminekovo' igi mili nizavo ingine a'mido' ningi mini' mini' ilizani' ne'mo nene lingine gamazi li-ngimamavosi Kilisito'nimu' gili ele'vole' igi eze zuhouko ha di imine' mili minilizahe. Nemu' lengi' nene ha gelekele' i-ngidivo' minilo. 3 Ido' gonolisetine nene okodine losuvolo' mineline' inite' ado' madudine zopovo nalava izi di ma'mine ma'mine iga' nehe, ngolidunu' lili' ani' inite' nehe, okodido' inite' lamine' tamine' nehe, nevo'mine inite' neve nene minelivoba 4 asi lengemeni dameni lutinguko haleko minaa' neine' ado' hongu lo alaha' ogo minaa' lengemeni dameni ne'mo nene litehe elo osu' lamo gonolisetine gihile mineleseive. 5 Ee, ido' gomu' vomila O'mosola gi'mizi mini ezelo' gili mu'musi' igi minaa' ani' vene' nete nene lute'mi gonolise've minelive li a'mine ne'mine monovolo' e'metisa va'ningida gelekele' i-ngidi minani' nenako lengitasi ne'mine monovotine mineline' nene lamine' oloseive. 6 Mene noluvoni' nene ado' Sala' aza Abalahamu'nimu' nenito' gizebo ve ve lo gamazi've gele do'mo vo minaa' ine' ma'minemu' nene noluve. Ido' lingine monovo laminetokovo' e'meti mini ne'mine mana'mine initekumu' golise gilami minilizani' nene ei' aluvo gidini mini ei' gili vani' minilisave.

7 Ido' va'ninge lingine eledinginemu' luvodi'mine ogo ti' lo nolo-lingimuve: Lingine nene O'mosola laa' olone' akate nene goloso ogalive li eledinginemu' nene ingine amuzo damani' mini lelitoti' nene limisa nizave li ngele'mize lamine' igi mini O'moso'mo lehize-ledavo minevo' alevo' oga' lemeni dameni nene engikisi lelikisi makato' dalonive ne nizave li ele'vole' i-ngidami asi gili nge li mini zou li makato' lamini bizi minilo.

Monovo Lisihe' Lamineto' E'metilizadi'mo Mulumo Geni Gihilizani' Nene O'moso'mo Ninge Lamine' O-lengedeleseinaze. Lingine Monovo Laminekovo' Igi Mili Minilo Lo Petolo' Lo-ngimine' Gamazi

8 Naza gamazi lo osu' lo do vo no'novo molalosa ti' lo nolo-lingimuve: Lingine lutine gatine nene hamoli'minevo' minivosa minilo. Ido' ge mulumo'ne ninge-nede ne mulumoka ninge-gede lisavo' minilo. Ido' lengi' nene hamo' zuho nizanaze. Ge luka neme ne lu'ne geme lisavo' minilo. Ido' ezemu' mulunga hukivo hukivo gezemu' muluno hukivo hukivo lisavo' minilo. Ido' hokolize' ami okodine di'mi limivo' minilo. 9 Ido' lengi' di goloso nii-lingidavo ma a'mido' golo hizi di goloso i-ngidamilo. Ido' a'mine'mine igi lengi' nene gamazidunu' gizi'voti gamazi ma nili-lingidavo ma nene a'mido' golo hizi lingine gizi'voti li-ngidamilo. Asi O'moso'mo lengi' vise lo do eita ine' nene eitati' nene no'noho' dalizave losa ne'mine ine' nenako nemu' nene ne'mine nii-lingidavo ma a'mido' nene O'moso'mo no'noho' ize-lingidivo lisavo' nene li-ngimilo. 10 Mene nolo-lingimuvoni' gamazi neve nene mono' godolou' gamazi ti' li gizi nizani' malo' nene vo nodave:

Ve ma aza minevo' alevo've lamine' minivo
laminekovo' mine do dizelesa gelelive nene
vele'mo gamazi gosoho' nasaha' lo gamazi goloso lalive lo
velelo' nene gizebo lamine' ilive.
11 Ido' monovo golosomu' nene olovo' o mino monovo laminekovo' ilive.
Ido' hongu lo lamino minaa' monovomu' nene vise' ogo
imisele do vo dalive.
12 Ee, Guvelesi ve'mi vele nene evene' lisihetokovo' hulo mino
gizebo o-ngedo mino
ezemu' lilizani' gamazi nene gelelesa gapepe' o minaa' neiha
evene' monovo goloso daa' avela nene gololo' ninge-ngedo minaa' neine' nenako
nemu' nene a'mine minevo' alevo' lamineku' minelesa gelelive nene
a'mine meuko luvoni' ne'mine nene ilido' o neive.
13 Ido' lingine monovo laminekovo' igi mili ilisa amuzo mili minilizani' nene evenelite ma di goloso i-lingidilizado' o neihe. Mo o'ove. 14 Ne neiha monovo lamine' igi mili ilizangumukisi mulumo gono ma gihi-lingidilizani' nene O'moso'mo ninge lamine' o-lengedeleseinako lamine' oloseive. Lingine evenelite lengehelele izeline' inite' i-lingidilizani' nene muludine badavo golise gilamilo. 15 Kilisito' nene lengi' lutine'mi Guvelesi ve minelive li ele'mizi milalo. Ido' lingine Kilisito'nimu' gili mu'musi' i nizangumu' evenelite longo' i-lingidika' i-lingidika' ilizado' nene a'mine gili mu'musi' i nizani' ne'mi monovo nene li ngolo' li li-ngimilizado' di va'va' ikisavo' minilo. 16 Ido' ne'mine igi li-ngimili ma nene humedame ami hongu gamazi laminekovo' li-ngimilo. Ido' lingine Kilisito' evenelelite ilizado' o neine' monovo lamine' igi mili minaa' naangumu' divi ledivi' igi laa' nave nene a'mine lengemenga langumu' nene ngovozo hililizangumu' ve li monovo lisihe' lamine' gehepeve neive li lutingu' gili nizadokovo' nene e'meti minilo. 17 Ido' O'moso'mo gelavo lingine mulumo geni gihilizado' o noline' nene lingine monovo laminekovo' e'metilizadoti' a'mine mulumo geni gihilizani' nene lamine' oloseiha lingine mulumo geni gihilizani' nene mo monovo goloso dalizadoti' gihilizani' neve nene mo goloso oloseive.

Kilisito' Aza Ve Lisihe' Mino Monovo Goloso Ogo Molo Amine'za Leli' Lihimetemu' Mulumo Geni Geho Helosa Gohi Oto Okulumokuko Dizo Neive Lo Lo-ngimine' Gamazi

18 Ee, Kilisito' azasi nene mulumo alumo gelo hiline' ve. Aza nene ve lisihe' minine'za O'mosola do bize-ledelesa evene' goloso leli' lihimetemu' lelito' medelo hiline' ve. Ido' a'mine gamene hamokovo' hiline' a'ne'mo nene leli' mukiliti lihimete nene mo osu' lilido' vo dani' ve. Aza neve nene evene' leli' okode ne'minesi neivosa nene bili hilani'za sikalahu've nene O'moso'mo do upuho' o-davo vele gizosa 19 a'mine sikalahu've nesi mino nene vo nala' numungu' minani' sikalahu' nene mono' lo-ngimine' ve. 20 A'mine mono' lo-ngimine' sikalahu' nene gomu' Noa' minine' gameneu' Noa' aza sipi lolo' neivo O'moso'mo evene' engikumu' izebolo' molavo geto ngebelamo ha gizebo o minine' gameneu' eze gamazi gili hulave engi' nene mono' lo-ngimine' ve. A'mine sipiu' nene evene' ngomosi' eiti a'ne'minevo' dizikevo O'moso'mo nosodunu' do ngu' izine' ve. 21 Ido' a'mine noso velo ani' nene noso holaali'mi avazaha ne'mine nene soto' ine' ve. Ee, noso hilaa' naadoti' nene O'moso'mo do lungu' izaa' neive. Ido' noso holaa' noune' nene okodelo' goloduvo gilite-ledelive losa nevoba asi O'moso'mo lute do guluvi' lo-ledavo guluvikovo' lo minaa' ilive losa ezela lo noso holaa' noune. Ido' a'mine O'moso'mo do lungu' izaa' neine' nene Izesu' Kilisito' hilinguti' otidi'mo ve losa do lungu' izaa' neive. 22 Ido' Kilisito' ei' neve nene idise Okulumokuko dizo O'mosoloti' lemo mino ana hulaa' idaa neivo angelo' nesi ido' ato ato' amuzo'inesi mini'mi monani' nesi nene gizeneuko limi gelekele' i-di nizavosa gizebo o-ngede neive.